Paarl-Oos speel skitter-krieket
2008-01-24
GMT PAARL-OOS se eerste en tweede span het ’n skitter naweek beleef toe beide spanne hul opponente afgeransel het om onoorwonne uit die naweek te tree. Saterdag het Paarl-Oos na Worcester gereis om die span van Worcester United te pak. Paarl-Oos het die loot gewen en met sy besluit om eerste te kolf het hulle 200 lopies na 45 boulbeurte aangeteken. Paarl-Oos se beste kolwers was Jackie Daniels (30, 3x4), Elroy Abrahams (33, 4x4 en 1x6), Morné de Vries (22, 3x4) en Bruce Miller (23, 2x4). Vir die tuisspan het S Pretorius (3/22) goed geboul. Die besoekers het goed geboul en met Hubert Ontong (5/36) aan die spits kon Worcester slegs 177 lopies aanteken. Worcester se beste kolwer was S Pretorius (48, 7x4). Paarl-Oos II het ook op Worcester se velde geseëvier deur Worcester United II met 3 paaltjies te klop. K Daniels het goed gekolf vir die tuisspan (56, 6x4). Kyle Julies (2/27) en Wayne Miellies (5/27), was Paarl-Oos se beste boulers. Met Worcester wat 153 lopies aangeteken het, moes Paarl-Oos hard veg om te wen. Goeie kolfwerk was benodig deur die veteraan-speler, Rohan Sollom (33*, 2x4 en 2x6). Hy is goed bygestaan deur Garth Lewis 38 (5x4 en 1x6) en Dane Schoor (37, 2x4). Vir Worcester het JP Matthee goed geboul (4/22). Op Sondag het Paarl-Oos gasheer gespeel vir die span van Vredenburg/Saldanha. Die tuisspan het die loot gewen en besluit om eerste te kolf (231/7). Bruce Miller (50, 8x4), Tiaan Cloete (57, 3x4) en Jackie Daniels (35, 2x4) was Paarl-Oos se beste kolwers. Vir Vredenburg/Saldanha het S Summers (2/43) en Q Kannemeyer (4/32) goed geboul. Vredenburg/Saldanha kon slegs daarin slaag om 210 lopies aan te teken. W Wyngaard (91, 11x4 en 2x6) en D van Wyk (31*, 4x4) het goed gekolf. Clayton Blommetjies (2/22), Elroy Abrahams (2/39), Tiaan Cloete (4/51) en Hubert Ontong (2/32) was Paarl-Oos se beste boulers. * Saterdag speel Paarl-Oos tuis teen Bergrivier. Paarl-Oos II speel weg teen Bergrivier II
More
News
|
