PAARL se eerste krieketspan het die naweek maklik afgereken met Malmesbury op die Parys-velde.
Die tuisspan se boulers, Lyndon Fredericks (2/20), Ultalyn Ernstzen (3/17) en Alfredo Adams (3/25), het die besoekende kolwers beperk tot slegs 80 lopies.
Robin Andrews (22, 3x4) en Graham Adams (23, 4x4) het gesorg dat Paarl die wenlopies in die 17de boulbeurt aangeteken het. Die tuisspan het ’n bonuspunt verdien en sodoende voor gebly in die kompetisie.
Paarl II is steeds onkeerbaar nadat hy Malmesbury II in ’n wegwedstryd met 8 paaltjies geklop het. Malmesbury kon slegs 141 lopies aanteken. Randall Groenewald (2/3) was Paarl se beste bouler, terwyl Rudy Andrews (76*, 6x4 en 1x6) geskitter het met die kolf.
Paarl III het op Bergzicht met 6 paaltjies geseëvier teen Van Der Stel III, terwyl Paarl IV die naweek met 3 paaltjies verloor het teen Franschhoek I op Parys.
Saterdag speel Paarl I teen Paarl-Oos I op die Parys-velde. Paarl II pak Paarl-Oos II (New Orleans), Paarl III speel teen Northdene (Kraaifontein) en Paarl IV speel tuis teen Oostelikes. Sondag speel Paarl I teen Vredenburg/Saldanha I op Vredenburg. Paarl II speel tuis teen Vredenburg/ Saldanha II.
Saterdag bied Paarl krieketklub steak en slaai teen R35 per bord. Kaartjies is verkrygbaar by bestuurslede.
