Twee sterf toe motor rol
2008-03-13
TWEE Paarliete is Saterdagaand dood toe ’n motor gerol het naby Saron. Reddingswerker, Vincent Booysen, was van diens af en het omstreeks 22:00 op die ongelukstoneel tussen Saron en Gouda afgekom. Volgens hom het die bestuurder van die voertuig beheer oor die motor verloor op ’n draai naby die Klein Bergrivier-brug. “Die voertuig het oënskynlik eers van die pad afgery en toe gerol.” Booysen, wat noodtoerusting in sy motor gehad het, het dadelik die ambulans geskakel, en voor hul aankoms begin met noodbehandeling. Motoriste het gestop en gehelp om die toneel met hul voertuigligte te belig. Twee van die insittendes is egter ernstig beseer, en ten spyte van Booysen se pogings is een persoon op die toneel dood, en ’n ander later in die Lapa Munnik Hospitaal in Porterville. Nog ’n persoon is ernstig beseer. Die oorledenes is Hendry Monday en Juan Boks. Donovan Karelse is beseer.
More
News
|
