Jong Boishaaiers lok groot rugby-skole
2008-03-27
Jaco van Wyk
DONDERDAG was Brugstraat die strydveld vir nog ’n opwindende rugbytoernooi wat oor die Paasnaweek in die Paarl aangebied is in die vorm van Boishaai se o.15 rugbytoernooi. HJS se o.15’s moes tydens die toernooi lyf sterk hou teen skole soos Waterkloof en Westville, terwyl HJS se o.15 B’s ook in aksie was. Skole soos Gim, Boland Landbouskool, Rondebosch, Oakdale, Jeppe en Wynberg het ook aan die suksestoernooi deelgeneem. Die Boishaaiers het hul eerste wedstryd met gemak gewen deur Westville met 69-7 te klop. Saterdag het HJS egter met 15-0 vasgeval teen Waterkloof, maar die toernooi goed afgesluit deur Glenwood met 21-12 te wen. HJS se o.15B’s het teen Strand geseëvier met 19-7 en met 8-8 gelykop gespeel teen Waterkloof B. By St Johns se jaarlikse rugbytoernooi het HJS se o.19 A span met 29-14 geseëvier teen Glenwood, met 34-3 vasgeval teen Monnas en met 45-24 gewen teen Linden. Boishaai se o.14 A’s het oor die Paasnaweek na Outeniqua getoer vir ’n rugbytoernooi. Die Boishaaiers het vir Affies met 12-10 geklop en met 7-8 verloor teen Ermelo. By Gim se o.16 rugbytoernooi het HJS met 11-elk gelykop gespeel teen Affies, met 17-8 gewen teen Waterkloof en met 17-12 gewen teen Nelspruit.
More
News
|
