Broers skitter by Suid-Afrikaanse kampioenskappe
2008-04-03
Jaco van Wyk
TWEE belowende, jong broers van die Paarl, Albert en Jerome Korf, het uitstekend gevaar tydens die SA skole-atletiekkampionskappe vir hoër- en laerskole wat onlangs plaasgevind het.
Terwyl die 14-jarige Albert, wat tans in graad 8 in Hoërskool Gimnasium is, goud verwerf het by die SA Hoërskole Kampioenskappe wat in Rustenburg plaasgevind het, het die 12- jarige Jerome silwer losgeslaan tydens die SA Junior Kampioenskappe wat by die Bellville Velodrome aangebied is vir laerskole. Sedert Albert verlede jaar in Februarie met paalspring begin het, het hy reeds twee keer Boland en Wes-Kaap kleure in dié item verwerf. Tydens verlede jaar se SA Kampioenskappe het hy ’n bronsmedalje ingepalm in die o.15 paalspringitem toe hy slegs 13 jaar oud was. Albert het vanjaar weer Boland en Wes-Kaap kleure verwerf en ’n goue medalje losgespring in die o.15 paalspringitem op Rustenburg deur ’n wensprong van 3,90m te behaal. Sy jonger boetie Jerome, wat tans in graad 6 is by Klein Boishaai, het hierdie jaar eers begin diskus gooi. Die fris mannetjie het sy Bolandkleure gekry deur ’n wengooi van 33,6m te behaal en sy Wes-Kaap kleure met ’n wenafstand van 34,28m. Alhoewel Jerome nie goud huis toe gebring het na afloop van die Junior Kampioenskappe nie, het hy weer ’n persoonlike beste afstand behaal deur die diskus 36,5m ver te slinger en sodoende die silwer medalje gewen.
More
News
|
