Rose is meesters van hardlooprugby
2008-04-30
ROSES UNITED het Saterdag geweier om sy onoorwonne status in die Boland se Premier-rug- byliga prys te gee deur Black Leaves maklik af te stof met 41-17. Die manne van Wellington het weer gesorg dat hul agterlyn die praatwerk doen deur die bal mooi wyd te speel om vir lekker hardlooprugby te sorg. Die Rose se groot uitblinkers was Franzil September en Ignatius Korabie, met die senter, Cornell Hendricks, wat twee drieë vir sy span gaan druk het. Die Rose se kookwater heelagter, Garth April, se naam behoort ook genoem te word aangesien hy weer met skitterspel vorendag gekom het, veral wat die Wellingtonners se teenaanvalle aanbetref. Roses se drieë is gedruk deur September, Hendricks (2), Jacques Jansen, Korabie en Deon Williams. Roses se tweede span het sy wedstryd gewen met 41-0 en die derde span het gewen met 15-5.
More
News
|
