Foto's van oud en nuut te sien
2008-04-30
’n BUITENGEWONE FOTOGRAFIE-PROJEK is maar een van die vele aktiwiteite waarna uitgesien kan word by die Breytenbach-sentrum op Wellington. Die fotografie-projek staan onder leiding van Hendré Retief en Alisa Farr. In hierdie projek word die ou-dorpse Wellington in herinnering geroep deur ’n uitstalling van foto’s wat toentertyd afgeneem is. Hierdie foto’s is verkry deur die Wellingtonse Museum. Maar dit is nie waar die projek ophou nie. Leerders van verskeie plaaslike laerskole gaan nou dieselfde strate invaar as wat destyds afgeneem is en foto’s neem van hoe die dorp nou daarna uitsien. Die uitstalling sal open op 7 Mei om 19:00 met ’n storie-aand, waartydens Winnie Rust, Charlotte Cupido en Callie Theron staaltjies sal vertel oor die oudorpse Wellington en sy mense. Die program word afgewissel met musiek deur Eddie Gertse. Belangstellendes moet bespreek teen 5 Mei by 021-873-786. Die uitstalling duur tot 30 Mei. Vir navrae en besprekings, kontak die Breytenbach-sentrum by 021-873-2786 of theokemp@breytenbachsentrum.co.za.
More
News
|
