Tiere vind steeds nie voete
2008-05-22
YOUNG PEOPLES sukkel steeds om hul voete te vind in die klipharde Superliga B-kompetisie. Peoples het Saterdag op Daljosafat in die laaste 10 minute van die wedstryd met 15-24 verloor teen Bellville-Tech. Peoples het vroeg in die wedstryd met 3-0 voorgeloop ná ’n strafdoel deur Dominique Daniels. Bellville-Tech het egter vinnig teruggeveg met ’n drie om met 7-3 voor te loop. Ná ’n pragtige agterlynbeweging het Peoples se Sam Titus onder die pale gaan druk om die rustydtelling 10-7 te maak. Kort na rustyd is Titus weer oor die doellyn om die Tiere met 15-7 te laat voorloop. Na 20 minute se spel in die tweede helfte het Peoples albei hul voorrye verloor deur beserings wat toegelaat het dat Bellville-Tech beheer oor die wedstryd kon kry. Kort hierna het Peoples se damwal gebars. Die besoekers se swaar voorspelers het Peoples se voorspelers ingetrek en Bellville-Tech se vleuel het gaan druk. Hierna is Peoples se kaptein, Barry Williams, van die veld gestuur. Bellville-Tech het die geleentheid goed benut en onder die pale gaan druk om die Tiere met 24-15 te klop. Peoples II het met 8-17 verloor en Peoples III het met 12-17 verloor. Peoples speel Saterdag weg teen Strand-United. Busgeld beloop R20 en vertrek om 10:30 uit Groenheuwel.
More
News
|
