DIT is met skok en wanhoop dat ons die artikel van verlede week se voorblad van Paarl Post gelees het.
Dit is regtig vir ons oumense van Noorder-Paarl belaglik. Eers maak hulle Wynland- Apteek hier in Noorder-Paarl se deure toe en nou is dit DisChem in die dorp.
Ons pensionarisse het skaars geld vir brood, nou moet ons R10 betaal vir aflewering vanaf die Mall.
Ons het ’n ACVV- bussie wat weekliks dorp toe gaan en sodoende kon ons dingetjies in die dorp doen, nou is dit kilometers na ’n bekostigbare apteek.
Ag nee man! Kan ’n mens nie ’n apteek open in die leë perseel langs Foodzone kafee (voorheen Fanie Malan) nie?
Ons oumensies sal dit regtig waardeer indien iemand vir ons ’n oplossing vir hierdie probleem kan kry.
Moedeloos, Noorder-Paarl
Dis-Chem antwoord:
Die ellende van die middedorp soos beskryf in die Paarl Post kom al ’n geruime tyd aan.
Dis-Chem voel ook moedeloos met die situasie. Aan die positiewe kant het ons ’n gratis afleweringsdiens in die dorp.
Hierdie diens is nog ’n besparing bo en behalwe DisChem se lae pryse en wye produkreeks.
