Cultivaria soek talent
2008-07-10
VANJAAR beoog die organiseerders van die Cultivaria Kunsfees om hul aandag op plaaslike talent te vestig tydens ’n konsert saam met Jamali. Die Cultivaria feesprogram vir 26 tot 28 September sal stampvol wees met meer as 100 top produksies. Die feesorganiseerder, Gerhard Meyer, sê: “Die fees moet ook ’n platform skep waarop plaaslike kunstenaars blootstelling kry. “Daardeur skep ons ’n nalatenskap wat lank na Cultivaria kan voortbestaan en ’n ongelooflike positiewe impak op ons vermaaklikheidsbedryf kan lewer.” Om hierdie doelwit te bereik, bied Cultivaria vanjaar ’n spesiale Local is Lekker konsert op Vrydag 26 September en Saterdag 27 September in die VGK Huguenot se Strauss-saal. Idols 2007 wenner, Jody, sal saam met gewilde Bolandse kunstenaars, die Kingston Rockers en Ysterkoei, die gehore laat gons. Talentvolle Paarliete kan saam met hulle tydens die voorprogram optree en Cultivaria organiseerders versoek ontluikende sterre met sang- of danstalent om aansoek te doen. Aansoekvorms is by die Cultivaria-kantoor, Hoofstraat 132, Paarl. Vir meer inligting, skakel Velicia of Linelle by 021-872-9754.
More
News
|
