Pniel begin tweede ronde op wennoot
2008-07-17
PNIEL VILLAGERS het daarin geslaag om die span van Primrose, op laasgenoemde se tuisveld, oortuigend met 23-8 te klop in hul eerste wedstryd van die tweede ronde in die Superliga B-kompetisie. In ’n baie aanskoulike wedstryd was die grondslag vir die oorwinning gelê deur die besoekers se agttal wat goed geskrum en gedryf het. Onder Pniel se agtal verdien die kantman, Jameel Ladouce, spesiale vermelding, asook Mark Arendse en Reagan “Honda” Africa. Agterlangs het die losskakel, Angelo Nelson, goeie spel gelewer. Die senter Stefanus Cedras het ’n paar keer vlymskerp gebreek terwyl die vleuels, Ricardo Windvogel en Gavin Petersen, sterk genael het. Petersen, Claude Voss en Garland Alberts het Pniel se drieë gedruk terwyl Ricardo Windvogel twee strafskoppe en ’n doelskop behaal het. Pniel Villagers speel Saterdag tuis teen Kuilsrivier.
More
News
|
