Boumateriaal gou teruggevind
2008-07-31
DIE oplettendheid van ’n skof polisiemanne het gelei tot die spoedige terugbesorging van gesteelde boumateriaal en toerusting. Terwyl hierdie beamptes Woensdagaand verlede week ondersoek ingestel het by ’n vermeende smokkelhuis in Vanwyksvlei, het hulle opgelet dat daar talle sakke sement op die perseel rondlê. Toe die moeë beamptes op pad was om uit te klok die Donderdagoggend, het ’n boukontrakteur ’n diefstal by die polisiestasie kom aanmeld. Die diewe het die slot van ’n houer op sy perseel in die Wellington nywerheidsge- bied afgebreek en ’n kragopwekker gesteel, asook verf, sement en nog gereedskap. Toe die beamptes hoor van die sement, het hulle twee en twee bymekaargesit, en hulle is terug na die smokkelhuis. By nadere ondersoek het hulle nie net afgekom op die boukontrakteur se gesteelde goedere nie, maar nog bougereedskap wat vermoedelik ook gesteel is. André Morrilly is in hegtenis geneem in verband met die diefstal. Nodeloos om te sê, die boukontrakteur was geweldig verlig, want die toerusting was nie verseker nie. Diegene wat nog boumateriaal en gereedskap vermis, kan die Wellington polisie kontak by 021-864-8440.
More
News
|
