Vier Taalmaand met skrywers
2008-08-07
AS deel van die Afrikaanse Taalmuseum se Taalmaandvieringe het dié plaaslike museum steeds ’n propvol program vir liefhebbers van die Afrikaanse taal. * Vroue vanaf die Bybeltyd tot nou is ’n gesellige oggend met geestelike danse, demonstrasies en verversings aangebied deur die Dorkasklub en ATKV Dames, Paarl . Dit is Saterdag om 11:00, in die Huguenot Gemeenskapsaal, Jan van Riebeeckweg, Paarl. Kaartjies is R25. Skakel 021-862-1223 of 021-862-2474. * In Afrikaans van toeka tot nou gee studente van die US Dramadepartement nuwe lewe aan die geskiedenis van Afrikaans vir graad 8 en 9 leerders op 12, 13 en 14 Augustus om 09:30 in die Toringkerk-saal in die Paarl. Kaartjies is R2. Skakel 021-872-3441. * Oom Karel en sy geweer is ’n gesellige kuieraand vir vyf-en-vyftig-plus met Johann Symington, redakteur van Kerkbode, as spreker Dinsdag 12 Augustus om 19:00 in die NG Kerksaal Agter-Paarl. Kaartjies is R60 en aandete is ingesluit. Bring eie wyn. Skakel 021-872-3779 of 076-488-8864. * In die tweede Mathews Phosa-gedenklesing tree Henry Jeffreys, redakteur van Die Burger, as spreker op met ’n toer deur die uitstallings van die Taalmuseum Donderdag 14 Augustus om 18:30 by die Taalmuseum Historium in die Paarl. Skakel 021-872-3441. * Musikale pêrels is ’n moet vir opera-liefhebbers, wanneer die alombekende Kaapse Operagroep musikale pêrels uit gewilde opera’s en operettes sing Vrydag 15 Augustus om 19:00 by die Hoërskool Gimnasium Ouditorium. Kaartjies is R60 (met ligte verversings). Skakel 021-863-3839 0f 072-997-5611. * In ’n Lewe gesels Johan Geldenhuys met prof John Kannemeyer oor sy nuwe biografie oor Etienne Leroux en oor sy bundel opstelle “Uit puur verstrooiing” Saterdag 16 Augustus om 10:00 in die Taalmuseum Historium in die Paarl. Kaartjies is R45 (ligte middagete en wyn ingesluit). Skakel 021-863-3839 of 072- 997 5611. Boeke sal te koop wees.
More
News
|
