Labori staan sterk
2008-08-14
DIE eerste rugbyspan van Hoërskool Labori, wat vanjaar kookwater rugby speel, het hierdie kwartaal voortgegaan waar hulle verlede kwartaal opgehou het. Nadat die sterk span van Hoërskool Vredenburg, met onder andere twee Cravenweekspelers, op ietwat gelukkige wyse met 16-10 geseëvier het teen die Paarliete (Labori druk twee drieë teenoor Vredenburg se een drie), het Labori vir Goudini met 43-7 afgeransel. Labori het ook die puik span van Hermanus met 26-16 geklop, met 8-6 klaargespeel met die onoorwonne span van Bredasdorp, en met 22-17 geseëvier teen Monument Park. Die Vikings, soos Labori se eerste span bekend staan, se totale prentjie ten opsigte van voorseisoen- en ligawedstryde lyk tans uitstekend, met agtien wedstryde gespeel, veertien gewen, drie verloor (al drie met minder as ses punte) en een wedstryd gelykop. Dit laat die Vikings met ’n prestasiepunt van 81%. Labori beleef tans een van sy beste seisoene in jare en wil graag dié jaar op ’n hoogtepunt afsluit wanneer hulle volgende Saterdag (23 Augustus) vir Bosmansdam aandurf tydens die jaarlikse interskole- wedstryd. Die wedstryd sal op Labori se velde beslis word.
More
News
|
