Hof herrys binnekort
2008-08-21
Lise Beyers
HERSTELWERK aan die Paarl Landdroshof, wat in Januarie deur brand beskadig is, sal binne die volgende maand begin. Die Landdroshof is op 16 Januarie byna in puin gelê toe die vlamme verskeie kantore, asook die siviele hof, verwoes het. Die brand het vermoedelik ontstaan deur ’n elektriese kortsluiting in een van dié kantore. Maar hierdie brand het nie die hofowerhede gestuit nie, en binne ’n dag het hofverrigtinge voortgegaan, al was daar ’n paar vertragings hier en daar. Weens die tekort aan ’n hofsaal, is Mbekweni sake verskuif na die Wellington Landdroshof, en die Franschhoek hof is heropen. Omdat die kantore waar onderhoudbetaling plaasvind, uitgebrand het, is hierdie betalings hervat by die Streekhof. Die Areabestuur- der van die Landdroshowe, Sherildene Martin, het gesê dat alles nou in plek is om óf teen die einde van hierdie maand, óf aan die begin van September met herstelwerk te begin. “Ons wag vir die ergste van die reënseisoen om op te hou en dan sal werk aan die Landdroshof volstoom begin. “As alles goed gaan sal dinge teen Maart na normaal toe terugkeer by die hof. “’n Mobiele siviele hof sal binnekort tot die beskikking van die hof wees. Dit sal druk op die kriminele howe verlig, en sal ook dienslewering verbeter.” Martin beveel aan dat die publiek eerder hul onderhoudsbetalings elektronies moet doen om tyd te bespaar. * Repair work to the Paarl Magistrate’s Court, which was damaged by a fire, will soon begin.
More
News
|
