Diesel-diewe vas
2008-08-21
Lise Beyers
LEDE van die Wellington polisie het verlede week ’n deurbraak gemaak in die knaende golf van dieseldiefstal. Nadat ’n klag van dieseldiefstal op ’n plaas by Lady Loch ontvang is, is die polisie na die toneel om ondersoek in te stel. ’n Bakkie is langs die pad verlate gevind, en met verdere ondersoek is verskeie 25 liter kanne vol diesel versteek in die gras gevind. Die polisie het die registrasienommer van die voertuig opgeroep, wat vir hulle gelei het tot die Paardeberg. Hier is drie verdagtes vinnig vasgetrek terwyl hulle nog in ’n karavaan probeer skuil het op ’n plaas. Altesame 600 liter diesel is teruggevind. Dit is die eerste keer dat verdagtes in hegtenis geneem is in dié gebied vir dieseldiefstal. Talle boere is die afgelope paar maande lam gelê hierdeur, veral in die Paardeberg- gebied. Van hulle is reeds beroof van soveel as 4000 liter, en soos wat die dieselprys gestyg het, so het die onwettige handel van hierdie ‘vloeibare goud’ toegeneem. Dit blyk dat diewe laatnag diesel uit boere se tenks tap, en dan soos mis voor die son verdwyn. ’n Woordvoerder van die polisie het gesê dat diesel teen R5 per liter op die swartmark verkoop word. “Vir diewe is dit maklike geld, maar ons is op hulle spoor. “Ons waarsku ook die publiek dat diegene wat uitgevang word dat hulle diesel by onwettige handelaars koop, vervolg sal word.” Karel Wessels, Dawid Hendriks en Roger Williams is in hegtenis geneem in verband met hierdie diefstal. * Three men have been arrested in connection with diesel theft.
More
News
|
