Koppestamp op Boland-stadion
2008-09-04
Jaco van Wyk
SCHOOLZ UNITE bied môre (5 September) en op 12 September ’n opwindende o.19 rugbyuitklop- en plaatkompetisie vir hoërskole op Boland-stadion in Wellington aan. Schoolz Unite is ’n organisasie wat poog om leerders bymekaar te bring om op kuns-, kultuur- en sportgebied te ontwikkel. Met ’n wisseltrofee en R5 000 prysgeld op die spel, gaan die poppe môre behoorlik dans wanneer New Orleans vir Groendal op die B-veld pak om 15:00. Dié wedstryd word gevolg deur Wolseley Sekondêr teen ’n uitnodigingspan van Ashton en Desmond Tutu om 16:15 (B-veld). Om 17:00 meet Paulus Joubert en Waveren Sekondêr kragte op die A-veld, gevolg deur Schoonspruit teen Bergrivier om 18:15 (A-veld). Met toegangsgelde van slegs R15 (R10 vir leerders) kan toeskouers hul lippe aflek vir pragtige hardlooprugby aangesien van die Boland se beste skolespelers hul talente ten toon gaan stel. Belowende spelers soos die heelagter Garth April (Bergrivier, SA skole en Boland Cravenweek), die heelagter Clayton Blommetjies (New Orleans, SA Akademiespan en Boland Akademie), die buitesenter Adri Jacobs (Schoonspruit, SA Suid-span en Boland Cravenweek), die slot Jovan Willemse (Schoonspruit, Boland Cravenweek) en die skrumskakel Dashton Wellman (Schoonspruit, Boland Cravenweek) gaan die toeskouers trakteer met gehalterugby.
More
News
|
