EK ry nie baie rond nie, laai ’n kind by die skool op en af en ry werk toe en terug, maar dit is skrikwekkend hoe motoriste in die Paarl ry.
Ek ry daagliks in ’n deel van Meulstraat met vier drierigtingstopstrate en in ’n deel van Bo-Pleinstraat met twee drierigting-stopstrate. Ek kan op my een hand tel hoeveel motoriste in ’n week werklik stop by enige van hierdie stopstrate.
Ek was al amper ’n hele aantal male in ongelukke betrokke wanneer ek van ’n suidelike rigting in Alexanderstraat ry en stop om in Bo-Pleinstraat in te draai, omdat motoriste oor die drierigting-stopstraat in BoPleinstraat jaag.
My vrou is ’n paar maande gelede 20:00 die aand by een van die drierigting-stopstrate in BoPleinstraat beboet omdat sy nie haar voertuig by die stopstraat heeltemal tot stilstand gebring het nie - hoekom is daar nooit deur die dag verkeersbeamptes om die stopstrate te patrolleer wanneer ek daar ry nie?
’n Ander stopstraat op my roete wat ook meesal deur bestuurders geïgnoreer word, is die vierrigting-stopstraat waar Mertenstraat/Gerickestraat en Prinsstraat kruis.
Hier ry ook baie gereeld ’n munisipale bakkie van die elektrisiteitsafdeling oor die stopstraat sonder om eens ’n poging aan te wend om stadiger te ry nie.
