Grusame vonds in murasie
2008-10-16
DIE liggaam van ’n vrou wat drie maande gelede in Groot Drakenstein vermis geraak het, is verlede week gevind in ’n murasie in Simondium. René Julies is op 4 Julie by die Groot Drakenstein polisiekantoor as vermis aangegee, nadat sy vanuit haar suster, Mercia Julies, se huis by Simondium Wynkelder verdwyn het. Julies het vroeër vanjaar vanaf Pofadder na Groot Drakenstein verhuis, op soek na werk. Verlede week het ’n werker op ’n plaas in Simondium op die grusame vonds afgekom van ’n erg ontbinde liggaam wat versteek was in ’n murasie op die plaas. ’n Nadoodse ondersoek sal nou eers moet bepaal hoe Julies gesterf het. Enigiemand met inligting wat die polisie kan help met hul ondersoek, kan vir insp Auckland Losper skakel by 082-937-8070.
More
News
|
