Oorhaastigheid kelder Paarl-Oos
2008-10-23
OORHAASTIGHEID om lopies aan te teken en onoordeelkundigheid het Saterdag vir GMT Paarl-Oos sy 20/20 wedstryd teen Wellington, gekos. Wellington het die loot gewen en besluit om eerste te kolf. Die tuisspan het 117 lopies aangeteken vir die verlies van 9 paaltjies. Vir Wellington het M Genis (22, 2x4), Piet Bergh (21, 2x4) en Marnus Hugo (41, 1x4 en 3x6) die beste met die kolf vertoon. Waylin September, Tiaan Cloete en Herbert Ontong het stewige vertonings vir Paarl-Oos met die bal gelewer. Paarl-Oos kon tydens sy kolfbeurt slegs 113 lopies, vir die verlies van 7 paaltjies, behaal, met Kurt Julius (30, 3x4 en 1x6) en Tiaan Cloete (34, 2x4 en 1x6) wat goed gekolf het. Wellington se beste boulers was Christo Ritter, D Opperman en J du Plessis. Wellington het met 4 lopies geseëvier. Paarl-Oos se tweede span het veel beter gevaar deur Wellington II met 7 paaltjies te klop. Wellington het die loot gewen en 150 lopies, vir die verlies van 5 paaltjies, aangeteken (in 20 boulbeurte). Wellington se E Slabbert (88, 8x4 en 4x6) en C Williams (22, 4x4) was Wellington se beste kolwers, met Wayne Minnies en Dane Schoor wat goed geboul het. Met Paarl-Oos in die kamp het Werner Erasmus (55, 3x4 en 4x6), Garth Lewis (59*, 6x4 en 4x6) en Donovan Adams (20, 1x4) puik gekolf om die wenlopies ná 16,3 boulbeurte te behaal. Paarl-Oos III het Saterdag vasgeval teen Young Peoples III. Saterdag (Pro-20) speel Paarl- Oos I en II tuis teen Bergrivier I en II, terwyl Paarl-Oos III weg speel teen Wellington III. * Paarl-Oos hou Saterdag om 18:00 ’n disko met kosverkope by Fairplay Pub. Toegang is R15.
More
News
|
