Leer kortverhale skryf
2008-10-30
NÁ die groot sukses van die vorige skryfskole, bied die Breytenbach-sentrum op 21 en 22 November ’n kortverhaal- werkswinkel aan met Rachelle Greeff as die aanbieder. Greeff is ’n bekende en gewilde skrywer. Haar kortverhale het reeds die CNA-debuutprys, die Sanlam Literêre Prys, en die RAU-prys vir Kreatiewe Skryfwerk ontvang. ’n Kortverhaal van haar is ook genomineer vir die Caine-prys vir Afrika-literatuur en haar debuutroman is in Nederlands en Duits vertaal. Haar nuutste rubriekboek, Alles behalwe die geheim van my whiskies, het vroeër vanjaar by Human & Rousseau verskyn. Voornemende deelnemers moet elk ’n storie van nie langer nie as 2 500 woorde skryf en dit teen 14 November voorlê vir keuring by onderstaande adres. Daar is slegs plek vir twaalf persone en elke deelnemer sal voor die tyd ’n leeslys ontvang van kortverhale deur gevestigde skrywers wat tydens die werkswinkel bespreek sal word. Verder sal die deelnemer se ingeskrewe tekste in diepte bespreek word en, anders as normaalweg, sal Greeff binne drie weke ná die werkswinkel help met die skaaf van die ingeskrewe tekste. Hierdie kommunikasie sal slegs per e-pos plaasvind. Die werskwinkel kos R950 (insluitend nota’s en ligte verversings). Vir verdere inligting en inskrywingsvorms, kontak die Breytenbach-sentrum by 021-873-2786 of e-pos theokemp @breytenbachsentrum.co.za.
More
News
|
