Paarl-Oos Krieket klop streekspan
2008-11-13
IN ’n goeie 20/20 krieketwedstryd het GMT Paarl-Oos Sondag ’n Worcester Streekspan, op Worcester, getroef. Die Paarliete het eerste gekolf en ’n skaflike 147 lopies behaal vir die verlies van 6 paaltjies. Kurt Julius (37, 6x4), William van Neel(23, 2x6) en Jacques Daniels (38, 1x4) was Paarl-Oos se beste kolwers. Met goeie boulwerk deur Paarl-Oos se Hubert Ontong (3/14) kon die span van Worcester slegs 86 lopies, vir 9 paaltjies, behaal. D Moolman (40, 4x4 en 1x6) was die tuisspan se beste kolwer. In nog ’n wedstryd wat Sondag beslis was, het Paarl-Oos se tweede span die kans deur sy vingers laat glip om vir Vredenburg/Saldanha ore aan te sit. Swak veld- en boulwerk was uiteindelik die Paarliete se ondergang. Dane Schoor (20, 2x4), Edrich Cook (24, 2x4), Wayne Jantjies (71, 7x4 en 1x6) en Leroy Goliath (38 lopies, 2x4) was Paarl-Oos se vernaamste bydraers tot hul 218 lopies vir 6 paaltjies. Vredenburg/Saldanha het hierop geantwoord met 220/5, om die wedstryd met 5 paaltjies te wen. Paarl-Oos se beste boulers was Urchill Duminy (2/46) en Zynodien Fredericks (2/32). Saterdag speel Paarl-Oos I en II teen Bergrivier I en II. Voorlopig sal die eerste span se te Bergrivier speel, met die tweedes tuis. Paarl-Oos I en II speel ook Sondag, in die pro-20 semi-finale op Stellenbosch. Wedstryde begin 10:30. Paarl-Oos III speel weg teen Northdene II op Kraaifontein.
More
News
|
