Paarl-Oos sit goeie vorm voort
2008-11-20
IN ’n wedstryd tussen GMT Paarl-Oos Krieketklub en Bergrivier Krieketklub wat Saterdag plaasgevind het, het eersgenoemde net-net daarin geslaag om dié wedstryd in te palm. Dit was ’n spannende wedstryd en die haas om lopies te jaag was duidelik, aangesien daar niks minder nie as drie spelers van Paarl-Oos uitgehardloop is. Die Paarliete het egter steeds die wedstryd met 5 lopies gewen. Paarl-Oos het eerste gekolf en 186 lopies aangeteken, nadat hulle in die negentiende beurt gestaan het op 84 lopies vir 5 paaltjies. Wilton Vanneel (44, 3x4) en Jack Daniels (28, 2x4) het egter tot Paarl-Oos se redding gekom. Tiaan Cloete (27, 3x4 en 1x6) en Bruce Miller (25, 4x4) het ook goed vertoon. Bergrivier kon met 181/9 in 45 boulbeurte net nie naby genoeg aan die wenspan se totaal kom nie. Paarl-Oos se beste boulers was Elroy Abrahams (2/42), Waylin September (3/19) en Tiaan Cloete (2/21). Paarl-Oos se tweede span (90/7) het ook geseëvier teen Bergrivier se tweedes (88/10), na laasgenoemde se Garth Abrahams (4/31) die Paarliete hard laat sweet het met sy goeie boulwerk. Wayne Jantjies (20, 3x4) was Paarl-Oos se beste kolwer, met Justin Williams (6/17) en Dane Schoor (4/18) wat vir Bergrivier laat klippe kou het. Paarl-Oos se derde span (207/6) was ook aan die wenkant teen Northdene II (204/10). Paarl-Oos se beste kolwers was Roger Cupido (37), Lucian Andries (39), Jermaine Didloff (35), Roderick Allies (33*) en Wilmid Willemse (35*). Janeiro Jantjies (4/43) en Enrico Apollis (2/33) was die Paarliete se beste boulers. In Sondag se 20/20 wedstryde wat in Stellenbosch plaasgevind het, het verkeerde besluitneming en swak boul- en veldwerk Paarl-Oos se eerstes en tweedes verhoed om die finale van die kompetisie te bereik. * Saterdag speel Paarl-Oos I en III weg teen Young Peoples I en III (Daljosafat) en Paarl- Oos II speel tuis teen Peoples II. Sondag speel Paarl-Oos I teen ’n Worcester streekspan en Paarl-Oos III speel teen Oostelikes III. Paarl-Oos se ledevergadering vind volgende Woensdag (26 Oktober) plaas by New Orleans se klubhuis om 18:00.
More
News
|
