IN ’n onlangse artikel in een van ons land se bekendste gesinstydskrifte was ek geskok om te lees van die vierjarige seuntjie wat in ’n ongeluk betrokke was met sy vierwielmotorfiets asook dié van twee ander seuns wat oorlede is in ’n soortgelyke ongeluk.
Verlede Maandag (17 November) ry ek om iemand te besoek in Joepatstraat, Sonstraal, Paarl.
’n Seun van ongeveer ses jaar oud op ’n donkerblou vierwielmotorfiets ry in die straat sonder om eers regs of links te kyk by die stopteken.
Waar is sy valhelm? Die pa of ma is nie in sig nie en ek dink terug aan ’n ongeluk ’n jaar gelede op dieselfde plek.
Maandag 24 November om 17:15 bestuur ek weer in Joepatstraat, Sontraal, en dié keer kry ek twee agt- tot negejarige dogters op ’n groen vierwielmotorfiets sonder valhelms.
Ouers, kyk asseblief na julle kinders. Openbare paaie is nie geskik vir vierwielmotorfietse nie.
Dit is ’n lekker speelding, maar dit kan julle kinders ernstig beseer.
