Slaggereed vir buurspan
2009-01-22
PAARL KRIEKETKLUB het die afgelope naweek die span van Malmesbury, op die Parys-velde, maklik met agt paaltjies geklop nadat die besoekers slegs ’n skamele 60 lopies kon aanteken in 23 boulbeurte. Vir die besoekers het net E Petersen (29, 1x4; 2x6) weerstand gebied teen die boulaanval van die tuisspan. Die openingsboulers, Clint Philander (3/13) en Ultalyn Ernstzen (2/21), het die kolwers van Malmesbury geteister voordat die draaier, Rohan Goetham (4/22) die stert van die besoekers geknoop het. Die tuisspan het die wenlopies in die dertiende boulbeurt aangeteken, met Robin Andrews (30, 5x4) die tuisspan se top kolwer. Paarl II het hul eweknie van Malmesbury met vier paaltjies geklop op die Parys-velde nadat die besoekers slegs 66 lopies behaal het in 24 boulbeurte. Lyndon Fredericks (2/19) en David Gabriels (4/4) het die boulaanslag van die tuisspan gelei. Paarl het die wenlopies in die dertiende boulbeurt behaal. Franco Marais het ’n onoorwonne 43 lopies aangeteken wat agt viere ingesluit het. Jason Cicero (3/21) was die besoekers se beste bouler. Eerskomende naweek se weg-wedstryd is baie belangrik vir Paarl I aangesien hul teenstanders, Paarl-Oos, die voorloper is in Afdeling II van die 45-boulbeurte kompetisie. Die kompetisie is egter nog wawyd oop en ’n wen sal wondere vir Paarl se titel aspirasies verrig. Saterdag se program is soos volg: Paarl I en II speel teen Paarl-Oos I en II op New Orleans en Allandale onderskeidelik, terwyl Paarl III teen Easterns III op Kraaifontein speel.
More
News
|
