EK wil hiermee ’n beroep doen op Noorder-Paarl se inwoners rakende die buurtwag.
Voor hulle besluit het om die buurtwag te stop in die woongebiede was daar baie min inbrake in Noorder-Paarl, maar die afgelope tyd was daar omtrent 17 inbrake in die omgewing.
Onlangs is ’n potensiële inbreker op heterdaad betrap waar hy oor ’n dak geklouter het om te sien wat in ons agterplaas aangaan.
Hy het toe alreeds kledingstukke van my wasgoeddraad afgehaal terwyl ons as gesin in die woonkamer gesit en TV kyk het.
Stemme buite het ons laat kyk na buite en toe sien ons vir Robert Larke en sy span die inbreker vastrek.
Nog voor hy enigiets anders kon steel, was die buurtwag daar. Daarvoor sê ons baie dankie aan hulle.
Ek kan nie glo dat R25 ’n maand nie almal se sakke kon pas vir die buurtwag nie - hulle weet wat hulle doen.
Hulle het baie goeie werk gedoen en ek hoop dat hierdie verdienstelike onderneming die steun van alle inwoners van Noorder-Paarl sal geniet ter beskerming van eiendom.
