Bergrivier bied atletiekbyeenkoms aan
2009-02-05
DIE jaarlikse tradisionele atletiekbyeenkoms vir plaaslike hoërskole vind plaas op Woensdag 11 Februarie te Daljosafat-stadion. Die gasheer van die prestige-byeenkoms is Bergrivier Sekondêr wat vanjaar sy 60ste bestaansjaar vier. Die ander skole wat gaan deelneem, is Weltevrede, Nooder-Paarl, Paulus Joubert, Klein Nederburg, Desmond Tutu, Ihlumelo, New Orleans, Charleston Hill en Wellington Sekondêr. Veral in die lang afstande word vuurwerke verwag en hier kan veral Antonio May van Klein Nederburg die rekordboeke herskryf. In die naellope is die leerders van New Orleans gewoonlik die gunstelinge om met die louere weg te stap. Die gasheerskool sal swaar steun op sy Boland 400m atleet Yusuf Salie om punte in te samel. Die byeenkoms kan ook vir vuurwerke sorg in die veldnommers met atlete wat hul voorberei vir die Boland-sentraal byeenkoms ’n week later op 21 Februarie. Die byeenkoms begin om 08:45 en eindig om ongeveer 16:30. Toegang beloop R10 (R6 vir kinders).
More
News
|
