Paarlvallei se eerste Astro-hokkiebaan word in styl ingewy
2009-02-12
DIE eerste Astro-hokkiebaan in die Paarlvallei is so pas voltooi op die skoolterrein van Hoërskool Gimnasium en word binnekort in styl ingewy. Op 20 Februarie word daar twee wedstryde gespeel teen die Argentynse klub, Champagnat. Gimnasium se o.18 A-meisiespan sal die openingswedstryd speel om 15:00 terwyl die Boland vroue A-span die hoofwedstryd sal speel om 17:00. Volgens Marzanne van Lill, voormalige president van Boland Hokkie, is dit ’n “fantastiese geleentheid vir die skool en ’n groot eer vir die Boland Hokkie Unie om Champagnat in die Boland te onthaal en die baan op so ’n wyse te open. “Dus wil ons graag die publiek nooi om hierdie geleentheid by te woon en die plaaslike spanne te ondersteun. “Ons wil ook van die geleentheid gebruik maak om Hoërskool Gimnasium te bedank vir die gebruik van die fasiliteite,” sę Van Lill. “Ons wens ook Champagnat sterkte toe met hul toer van drie weke in die Kaap en Port Elizabeth omgewing.”
More
News
|
