DIE ondersteuningsgroep vir aandagtekort of hiperaktiwiteitversteuring (Attention Deficit Hyperactivity Disorder of ADHD) vergader Woensdag 11 Maart by Chevé-klubhuis in Meulstraat, Paarl, vanaf 19:00 tot 20:15.
Dr Bennie Steyn, kinderpsigiater van Stellenbosch, praat oor redes vir swak skoolvordering. Toegang is R5. Kontak Retha by 021-872-5620 om te bespreek.
Drie tot vyf persent van alle skoolgaande kinders word deur aandagtekort of hiperaktiwiteitversteuring geaffekteer, asook ongeveer een-derde van hul nabye bloedverwante.
Aangesien aandagtekort of hiperaktiwiteitversteuring ’n langtermyntoestand is, verg dit ’n lewenslange aanpassing van die gesin by ’n neurobiologies-gebaseerde onvermoë wat hoofsaaklik in gedragsterme waargeneem word. Aandagtekort of hiperaktiwiteitversteuring kan baie areas in die kind se psigososiale funksionering nadelig beïnvloed.
Byna alle leerders met aandagtekort of hiperaktiwiteitversteuring toon verskeie leer-, sosiale en emosionele probleme. Aandagtekort of hiperaktiwiteitversteuring is ’n spektrumversteuring wat bestaan op ’n kontinuum met verskillende grade van ernstigheid en frekwensie.
