Skole slaags in sewes
2009-03-19
Jaco van Wyk
DIE rugbyvelde van Hoërskool Gimnasium was Saterdag, op ’n vuurwarm somersdag, die toneel van ’n heerlike sewesrugbytoernooi. Die Puma Atlantic Sewestoernooi het uitstekende hardlooprugby ten toon gestel, met Tygerberg wat uiteindelik die kroon om die beker onder die neuse van Paarlse spanne opgeraap het. Tygerberg se oorwinning het gekom toe hulle lag-lag met 48-7 klaargespeel het met Scottsdene in die finaal. Laasgenoemde het in die semi-finaal met 22-12 teen Schoonspruit geseëvier. Tygerberg het hul wedstryd in die semi-finaal, teen Gim se A span, met 14-12 gewen. Hoewel Gim se A-span in die halfeindstryd van die beker-afdeling die knie gebuig het teen die kampioene, het Gim se B span die Plaat ingepalm na hulle vir Paul Roos met 26-0 kafgedraf het in die Plaat-finaal. In die halfeindstryd van die Plaat het Gim se B-span met 24-19 afgereken met Bergrivier, terwyl Paul Roos met 26-12 baas was teen Klein Nederburg in die ander plaat semi-finaal. Ander skole wat ook in aksie was tydens die toernooi, was Hoër Jongenskool, Paulus Joubert, Brackenfell A en B, DF Malan en Excelsior.
More
News
|
