Swak afronding kelder Evergreens
2009-04-02
EVERGREENS RUGBYKLUB kon nie Saterdag, op hul tuisveld, die knoop deurhak teen Young Hearts van Pella nie. Swak afronding het die span van Paarl gekniehalter en gelei tot ’n 8-8 gelykopuitslag teen die besoekers. Die rustydtelling was 5-0 in Evergreens se guns Veral die eerste helfte was gekenmerk deur swak besluitneming aan Evergreens se kant. Evergreens het hulself egter in die laaste 20 minute van die eerste helfte reggeruk, met die senter Brian Bester wat agter die doellyn gaan kuier het vir ’n onverdoelde drie, nadat die tuisspan vanuit hul eie kwartgebied met die bal begin hardloop het. Gedurende die tweede helfte het Evergreens se losskakel, Neil Julies, met ’n strafskop geslaag. Young Hearts het egter met ’n onverdoelde drie en strafdoel geslaag, wat die eindtelling op 8-8 laat staan het. Evergreens se tweede span het hul opponente met 21-0 geklop terwyl die derde span met 17-12 verloor het. Evergreens speel Saterdag teen Newtons in Newtown, Wellington.
More
News
|
