ONS sê só min dankie, daarom is my brief ’n huldeblyk aan al die nooddienste, mediese en ondersteunende dienste wat betrokke was by die ramp by Paarl Print op Vrydag 17 April.
Die publiek besef nie altyd watter emosionele uitdaging so ’n gebeurtenis vir hierdie mense is wat oorledenes, beseerdes en getraumatiseerde naasbestaandes moet hanteer en behandel nie. Dit bly jou lewenslank by.
Baie dankie vir elkeen se onbaatsugtige optrede en dapperheid wat julle so onvoorwaardelik gee. Ons salueer julle!
In besonder aan die personeel en dokters van Paarl Medi-Clinic. Ons is trots op die manier waarop julle verlede Vrydag en ook die res van verlede naweek julself beskikbaar gestel het en julle beste gegee het.
Aan die naasbestaandes van die oorledenes en beseerdes: baie sterkte, julle is in ons harte en gebede.Wilesta Peens (Verpleegbestuurder, Paarl Medi-Clinic)
