DRAMATURGE en voornemende toneelskrywers kan naderstaan met dramatekste wat vir 2010 se Spat-kompetisie oorweeg kan word.
Met prysgeld van altesame R270 000 is Spat ’n belangrike inspuiting vir die ontwikkeling van nuwe Afrikaanse teaterproduksies. Die prys is daarop gemik om die skryf van professionele dramatekste aan te moedig, opkomende teaterkunstenaars die geleentheid te bied om hul talente te ontwikkel en daardeur die algemene standaard van Afrikaanse teater te stimuleer.
Hoogstens vier word gekies op grond van oorspronklike Afrikaanse dramatekste (ongeag dialek of streektaal) wat aanvanklik deur die skrywers vir oorweging aan enige van die dramadepartemente by tersiêre opvoedkundige instellings in Suid-Afrika voorgelê word en dan uiteindelik deur die dramadepartemente vir beoordeling ingeskryf word.
Die sluitingsdatum om tekste aan dramadepartemente voor te lê, is 30 Junie.
Meer inligting oor die kompetisie is beskikbaar by www.sanlam.co.za.
