Skitter-sege vir Evergreens in derby-kragmeting
2009-06-25
EVERGREENS se eerste rugbyspan het Saterdag groot veggees en karakter getoon om ’n begeesterde span van Newtons (Wellington) met 37-24 te klop op Evergreens Park. ’n Groot skare het dié wedstryd bygewoon, waartydens hulle getrakteer was op skitterende hardlooprugby deur Evergreens - ’n benadering waarvoor die tuisspan bekendheid verwerf het oor die jare. Reeds binne die eerste tien minute het Evergreens se Neil Julies (losskakel) en Lucky Stofile (slot) elk ’n uitstekende drieë gedruk. Julies het met een doelskop geslaag. Newtons het met hul sterk pak voorspelers teruggeveg en ’n onverdoelde drie aangeteken, maar Evergreens het steeds voortgegaan deur die wedstryd met vinnige temporugby te benader. Met dié benadering het Kallie Jacobs (vleuel) en Dean Jacobs (heelagter) vir die tuisspan nóg twee drieë aangeteken. Julies het geslaag met een doelskop. Newtons het geen raad gehad teen die skitterende hanteerwerk en spoed van Evergreens se agterspelers nie. Hier het Jacob beindruk met sy goeie aanvallende spel en bedrieglike systappe. Net voor rustyd het Newtons in Evergreens se gebied geboer en was hulle beloon met ’n verdoelde drie ná ’n rolmaalbeweging. Die rustydtelling was 24-12 in Evergreens se guns. In die tweede helfte het Newtons met goeie dryfspel vorendag gekom. Evergreens het egter met elke krummel balbesit aangeval. Sodoende het Regardt Liebenberg (flank) nóg ’n verdoelde drie vir die tuisspan aangeteken. Verder het Julies ook met twee strafskoppe geslaag. Newtons het laat in die tweede helfte twee drieë gedruk, waarvan een verdoel was, om die eindtelling 37-24 te maak in Evergreens se guns. Vir Evergreens het hul agterlyn, met veral Dean Jacobs in puik vorm, uitgeblink. Evergreens se voorspelers het ook met rotsvaste verdediging uitgeblink. Regardt Liebenberg, wat beïndruk het met sy duikslae, is aangewys as die speler van die wedstryd. Evergreens II het 18-5 gewen terwyl die derde span 13-3 gewen het. Evergreens speel eerskomende Saterdag teen Universals op Hopefield.
More
News
|
