Drakenstein se dames kwes Young Brothers
2009-07-09
DIE vroue-rugbyspan van die Drakenstein het Saterdag hul diepte onderstreep toe hulle, sonder hul WP-spelers, afgereken het met die vroue-rugbyspan van Young Brothers. Die Drakies het 41-15 geseëvier. Die Drakies se senters het agterlangs gewys dat staal geen dikte benodig nie en indien jou kommunikasie agterlangs reg is, gaan jou opponente maar sukkel om ’n gaping te slaan. Die Drakies se hegte verdediging het ook daartoe bygedra dat omgekeerde balbesit in drieë omskep kon word, met die Paarliete se vleuels wat elk twee drieë ingepalm het. Die kersie op die koek was die drie wat die losskakel Loukrisa ‘Kika’ Jacobs gedruk het - ’n speler wat stip dopgehou moet word deur die WP-keurders. Die Drakies se spelers is egter nog jonk en in die toekoms gaan hulle net verbeter. Theresa Ruiters (2 drieë), Areesa Grain (2 drieë), Rowena ‘Speedi’ Carolissen (2 drieë) en Loukrisa Jacobs het die drieë behaal, met Theresa Ruiters wat drie doelskoppe aangeteken het. Creschekay Quinn was die speler van die wedstryd.
More
News
|
