Groot nood op stasie
2005-08-25
DIE nood was groot, toe die passasierstrein uit die Kaap met sy neus in Wellington se damestoilet beland het.
Sy het haar “amper natgemaak” van skrik, vertel ’n vrou wat (gelukkig, sug sy) nog op pad na die badkamers was.
“Die trein het te vinnig gekom,” meen Annie Lerm van die Stasiekafee.
Sy was verlede Donderdag om 09:15 in die teekamer langs die mans- en damesgeriewe. Dis toe dat sy die slag gehoor het.
“Die mense het aangehardloop gekom om te sien wat aangaan,” het Annie gesê.
“Die drywer kon nie stop nie, en toe jaag hy met so ’n vaart in die remblok vas dat dit stukkend breek. Die trein stoot toe die blok om, en ry verder tot in die muur van die damestoilet.
“Gelukkig was daar op daardie oomblik niemand in die toilet nie.”
Die pendelaars in die wegholtrein het self maar geknyp, vertel die omstanders wat op die perron die petalje in ongeloof aanskou het.
Hulle en die drywer was behalwe vir skok, ongedeerd.
Die deel van die treinspoor en die perron wat deurgeloop het, is vinnig afgesper vir herstelwerk van sewe werksdae.
* A runaway train hit a toilet building at Wellington station.
More
News
|
