Geen keer aan Paarl-Oos
2009-10-29
DIE eerste krieketspan van Paarl-Oos het Saterdag besoek gaan aflê op Worcester, waar hulle klaargespeel het met die tuisspan, Worcester United. Worcester het die loot gewen en, met die besluit om eerste te kolf, kon die tuisspan 141/9 opstapel. Paarl-Oos se Zynodien Fredericks (2/23), Elroy Abrahams (3/22) en Tiaan Cloete (3/33) was die besoekers se groot boulangels. Met Curt Julies (31, 1x4), Waylon September (33*, 2x4) en Morné de Vries (30*, 1x4) op dreef, kon Paarl-Oos 143/3 behaal om dié wedstryd te beklink. Paarl-Oos II het Saterdag vir Franschhoek uitgeboul vir 133 op die New Orleans-velde. T Jacobs 48 (5x4) en L Walters (25, 3x4) was Franschhoek se beste kolwers. Paarl-Oos se Wayne Mielies.... (3/26) en Wilton Vanneel (4/14) het skade met die bal aangerig. Paarl-Oos het op sy beurt slegs 13,4 boulbeurte benodig om die wentotaal van 135/2 te behaal. Garth Lewis (56*, 9x4 en 2x6) en Werner Erasmus (37*, 6x4 en 1x6) het stewige kolfvertonings gelewer. Paarl-Oos III het eerste gekolf in hul wedstryd op Allandale teen Spes Bona, en ’n goeie 256/7 behaal. Wayne Jantjies (52, 4x4 en 4x6) en Kurtley Davids (70, 10x4) het goed gekolf. Paarl-Oos se beste boulers was G Wilson (2/47), Dale Watts (4/36) en Curtley Davids (2/30). * Saterdag speel Paarl-Oos tuis teen Malmesbury, Paarl-Oos II speel tuis teen Bergrivier II en Paarl-Oos III speel weg teen Van der Stel III. Op 7 November hou Paarl-Oos ’n karaoke by die klubhuis.
More
News
|
