EK besoek gereeld die stortingsterrein naby Wellington.
Hier moet ek aanskou hoe tonne afval, grotendeels plastiek, vanaf huise en besighede deur vragmotors afgelaai word. Die afval word dan platgestoot en deur ’n lagie grond bedek.
Ons versmoor letterlik die aardbol met ’n laag plastiek. Kan ons hierdie handeling regverdig?
Ons raak opgewonde oor groen en koop selfs organiese voedsel. Maar laasgenoemde produkte lê op die winkelrakke in ’n onvernietigbare houer. Wat beteken organies dan?
Is ons tegnologies nog so agter dat ons hierdie plastiek nie kon verwyder, vernietig of verwerk nie?
Is ons miskien nie net te lui of te trots om met ons eie sak die winkel te besoek nie?
