Paarl-Oos se tweede span teken goeie seges aan
2010-01-21
DIE tweede span van GMT Paarl-Oos Krieketklub het die afgelope naweek hul klub se naam hoog gehou met goeie oorwinnings oor Brackenfell en Maties. Saterdag het Paarl-Oos (337/7 na 45 boulbeurte) se naasbestes vir Brackenfell II (224/9 na 39 boulbeurte) gemaklik geklop. Werner Erasmus (66, 6x4 en 4x6), Roger Cupido (66, 7x4 en 1x6), Wilton van Neel (29, 4x4) en Roderick Allies (21* 3x4 en 1x6) was die Paarliete se beste kolwers, met Garth Lewis (3/47) en Wayne Millies (2/50) die beste boulers. Sondag het Paarl-Oos (153/4 na 32 boulbeurte) se tweede span met Maties III (152/10) afgereken. Erasmus (21, 4x4), Leroy Goliath (43, 5x4) en Wilton van Neel (33*, 4x4) was Paarl-Oos se uitblinkers met die kolf. Wade Adams (2/22), Germaine Williams (3/42) en Jarrod Cupido (2/8) het goed geboul. Eerskomende Saterdag speel Paarl-Oos I teen Young Peoples I op die New Orleans-veld, Paarl-Oos II speel op Allandale teen Northdene I en Paarl-Oos III speel weg teen Stellenbosch en distrikte.
More
News
|
