Paarl-Oos maak stem dik
2010-01-28
Jaco van Wyk
AS GMT Paarl-Oos Krieketklub op ’n gegewe dag eers behoorlik op dreef kom, dan is dit gewoonlik klaarpraat met hul opponente. Dit was weer eens Saterdag die geval toe hulle een van hul buurspanne, Young Peoples, met 5 paaltjies getroef het om ’n duidelike waarskuwing uit te stuur aan die res van die Premierliga-spanne. Paarl-Oos meet juis eerskomende Saterdag kragte met Boland se huidige kampioenspan, Brackenfell. Dit sal dus in die Paarliete se guns tel om dié wedstryd met selfvertroue binne te gaan. Teen Young Peoples die pas-afgelope naweek, ’n span wat gewoonlik nie sonder handskoene gepak moet word nie, het Paarl-Oos heel gemaklik met 5 paaltjies geseëvier. Young Peoples het eerste gekolf, maar kon slegs 117 lopies aanteken, te danke aan goeie boulwerk deur Paarl-Oos se ou staatmakers, Jade Adams (3/30), Waylen September (3/25) en Tiaan Cloete (2/12). September (39, 2x4) het ook Paarl-Oos se kolfaanslag gelei, met Bruce Miller (28, 1x4 en 1x6) en Morné de Vries (23, 3x4) wat hom goed bygestaan het. Sondag het Paarl-Oos (182/4) ook met Van der Stel (181) afgereken. Miller (67, 7x4 en 2x6) het die grootste skade aangerig met die kolf. Kurt Julius (38, 4x4), Roger Cupido (22, 4x4) en Waylin September (39, 7x4 en 2x6) het ook goed vertoon. Paarl-Oos se tweede span (111/3) het die afgelope naweek vir Northdene I (107/10) getrap. Garth Lewis (31, 5x4 en 1x6), Werner Erasmus (24, 3x4 en 1x6) en Keagen Petersen (23, 2x4) was Paarl-Oos se voorste lopiemakers, terwyl Wade Adams (3/43), Dennis November (2/19) en Jemaine Williams (2/4) die boulaanslag gelei het. In ’n wegwedstryd het Paarl-Oos III klaargespeel met Stellenbosch en Distrikte III. Dale Watts (96*, 7x4 en 2x6) was Paarl-Oos se groot angel, wat bygedra het tot sy span se 243/8. Die tuisspan het 238 lopies aangeteken. Eerskomende naweek speel Paarl-Oos I teen Brackenfell (New Orleans), Paarl-Oos II speel teen Maties II (Allandale) en Paarl-Oos III speel teen Northdene II (weg). Paarl-Oos hou Saterdag ’n kosverkope vanaf 12:00 en ’n disco vanaf 20:00 teen R10.
More
News
|
