Paarl-Oos slag Paarl in derby-stryd
2010-02-18
IN wat voorspel was as ’n watertand-derbystryd het GMT Paarl-Oos se eerste elftal Saterdag gemors met hul eweknieë van Paarl Krieketklub om ’n uitstekende 8-paaltjie oorwinning in te palm. Paarl-Oos het in alle afdelings van dié wedstryd oorheers, om Paarl uit te haal vir ’n droewige 56 lopies op die krieketveld van New Orleans. Elroy Abrahams (3/15) en Lee-Irvin Alexander (3/16) was dodelik met hul boulwerk, terwyl Tiaan Cloete (2/3 en 13* lopies, 3x4) met beide kolf en bal sy kant gebring het. Bruce Miller (20, 2x4) en Morne de Vries (14*, 3x4) het ook bygedra tot Paarl-Oos se wentotaal. Paarl-Oos se tweede span het self ’n soet sege behaal toe hulle met 4 paaltjies geseëvier het teen die tweede span van Young Peoples. Peoples het eerste gekolf en 195/10 aangeteken. Paarl-Oos se Zynodeen Fredericks (2/35) en Garth Lewis (2/33) was verantwoordelik vir die meeste skade met die bal. Die groot lopiemakers met die kolf vir Paarl-Oos (196/7), was Wilton van Neel (53*, 7x4 en 1x6) en Roger Cupido (34, 8x4). Om ’n puik naweek af te sluit, het Paarl-Oos se derde span ook met ’n sege vorendag gekom - ’n 4-paaltjie oorwinning oor Oostelikes van Kraaifontein. Paarl-Oos se beste kolwers was Hilton Hansen (47, 8x4) en Roderick Allies (31*, 4x6), en hul beste boulers was Hansen (3/23), Denstey Davids (2/26) en Roderick Allies (2/22). * Eerskomende naweek speel Paarl-Oos I weg teen Maties, Paarl-Oos II speel tuis (New Orleans) teen Wellington en Paarl-Oos III speel weg teen Brackenfell.
More
News
|
