Brand tref vyf wonings
2010-03-18
VYF gesinne van Amstelhof sit nou sonder ’n dak oor hul kop, nadat ’n brand Vrydagmiddag hul wonings vernietig het. Die brand het omstreeks 15:30 uitgebreek in ’n houthuis op die erf van ’n munisipale woning in Jan Fiskaalstraat. Dit het gou versprei na nog ’n houthuis en toe na die munisipale huise. Hier is een eenheid in die geheel uitgebrand, en ander het water- en rookskade opgedoen. Uiteindelik is drie wonings, en al die besittings daarin, vernietig. Niemand is in die brand beseer nie en die oorsaak van die brand is nog nie duidelik nie. Wyksraadlid Conrad Poole het die toneel besoek om hand by te sit. “Ek onderhandel tans met die Munisipaliteit vir tydelike akkommodasie vir die slagoffers. Dit kan tot vier maande duur voordat die munisipale wonings herstel word. “Maar hulle het meer as net hul huise verloor, en ek doen ’n beroep op die publiek om hul harte oop te maak en die slagoffers te help met basiese huisraad en klerasie.” Poole kan gekontak word by 082-497-9046.
More
News
|
