Onderwysers kry leiding oor Wetenskap Expo
2010-04-15
SKOLE wat nog wik en weeg of hulle later vanjaar vir die eerste keer wil deelneem aan die Stellenbosch-streekkompetisie van die Eskom Expo vir jong Wetenskaplikes, kan nadere besonderhede verkry by ’n werksessie wat daaroor aangebied word. Die werkswinkel word op 21 April in Stellenbosch vir belangstellende onderwysers en leerders aangebied deur personeel van die Instituut vir Wiskunde en Wetenskappe Onderrig (IWWOUS) aan die Universiteit Stellenbosch (sien www.imstus.sun.ac.za). Die streeksekspo self, waaraan skole in die Boland, Weskus, Overberg, Suid-Kaap en selfs dele van die Karoo deelneem, vind vanjaar van 26 tot 27 Augustus op Stellenbosch plaas. Inskrywings sluit op 6 Augustus. Leerders kry die kans om probleme te identifiseer, hipoteses te formuleer, data te versamel en te analiseer, afleidings te maak en om hul bevindinge effektief aan ander mense oor te dra. Leerders kan projekte in 25 verskillende kategorieë inskryf en moet ’n goedgedokumenteerde uitstalling en navorsingsverslag voorlę. Akademici en navorsers van verskeie fakulteite aan die Universiteit Stellenbosch, asook onderwysers en kenners uit die privaatsektor sal vanjaar weer as beoordelaars optree. Deel van die beoordelingsproses behels ook persoonlike onderhoude tussen die beoordelaars en elke deelnemer. Vir meer inligting, kontak Erika Hoffman by 021-808-3482 of ehoff@sun.ac.za.
More
News
|
