Paarl bly op wenpad
2010-05-27
PAARL RUGBYKLUB se eerste span het Saterdag, op die Faurestraat-stadion, vir Hamlets met 27-22 geklop om hul onoorwonne status in WP se Premierliga A te behou. Die eerste helfte was baie gelykop met Hamlets wat ietwat meer gebiedsvoordeel gehad het. Die rustydtelling was 3 elk met Louis Schlechter (senter) wat vir Paarl ’n strafdoel aangeteken het. Gedurende die tweede helfte het die span van Paarl beheer oor die wedstryd geneem en drie goeie drieë gedruk. Jaco Immelman (heelagter) het twee drieë gedruk en Janus Kruger (plaasvervanger-agtsteman) het ook ’n vyfpunter behaal. Aldrie drieë is deur Schlechter verdoel. ’n Nekbesering by een van Hamlets se spelers het ’n onderbreking van spel vir tien minute tot gevolg gehad en dit het Paarl se ritme totaal versteur. Paarl was egter vier minute voor die einde nog met 27-10 voor, voordat Hamlets twee vinnige drieë teen die einde van die wedstryd gedruk het. Paarl sukkel tans met talle beserings, maar die plaasvervangers het waardig hul man gestaan teen die masiewe pak voorspelers van Hamlets. Uitblinkers was Jaco Immelman, Andrie Greeff (slot) en Lionel Hugo (agtsteman). Die tweede span het 20-19 gewen en die derde span het 27-13 gewen. Paarl speel Vrydagaand tuis, op Faurestraat, teen die liga-voorlopers, Brackenfell.
More
News
|
