Gim trotseer hoë hekkie
2010-06-04
Jaco van Wyk
TERWYL Hoërskool Gimnasium se eerste rugbyspan Saterdag sy hande vol gehad het, maar tog sukses behaal het, teen ’n begeesterde spul Bishops-manne, het Hoër Landbouskool Boland en Hoër Jongenskool maklik afgereken met hul onderskeie opponente. Bishops, teen wie Gim hard geswoeg het om uiteindelik ’n welverdiende 34-32 sege te behaal, is egter ’n veel-moeiliker opponent as Sacs en Rangers, teen wie Boishaai en Landbou onderskeidelik hul man moes staan. Hoewel Gim op hul tuisveld vyf drieë teenoor twee aangeteken het, was die Biskoppe, wat vanjaar ’n puik seisoen beleef, rustyd met 13-12 voor. Gim se driedrukkers was Conrad Loubser (3 drieë), Christopher Bosch en Christiaan Smit. Lance Ruthford het 2 doelskoppe en ’n strafdoel behaal en Willie Viljoen het 2 doelskoppe aangeteken. ) Hoër Landbouskool Boland het Saterdag ’n magtige vertoning teen die manne van Sacs gelewer, om ’n oortuigende 33-16 sege te behaal. Landbouskool se drieë is gedruk deur Christoff van Tonder (2 drieë), Gerhard Jordaan, Jacobus de Kock en Nico Nel. Kyle Jacobs het 4 doelskoppe aangeteken. ) Op Brugstraat het Hoër Jongenskool Saterdag vir die klubspan Rangers/Silvertree ’n rugbyles geleer met ’n 65-0 vernedering van die besoekers. HJS se kaptein Stephan Coetzee (haker) het van voor gelei en was met 3 drieë beloon, met die senter Jean Nel wat ook ’n driekuns behaal het. Ander driedrukkers was JC Jooste, Louis Nel, Ryno van der Merwe en Leon le Roux, terwyl een strafdrie ook toegeken is. Devon Williams het 3 doelskoppe behaal en Coetzee en Nel het elk een doelskop aangeteken. ) In die Boland-liga het New Orleans Sekondêr ’n reuse 42-7 sege oor Hoërskool Labori behaal. Die rustydtelling was 13-7 in New Orleans se guns. New Orleans se driedrukkers was Edlynn Loff (2 drieë), Erhardt Kilowan, Clinton Ruiters, Danwill Hermanus en Donovan Williams. Engeldoe het 3 doelskoppe aangeteken, terwyl Engeldoe, en Byron Walters elk ’n strafdoel aangeteken het. ) In Wellington het Hoërskool Hugenote met 14-20 vasgeval teen HTS Drostdy, ná eersgenoemde rustyd met 8-3 voorgeloop het. Hugenote se drie is deur Godlen Masimla gedruk, met Maree Kotzé wat 3 strafdoele aangeteken het. * Eerskomende naweek gaan die koppe behoorlik stamp in twee watertandwedstryde, wanneer Hoërskool Gimnasium vir Hoër Landbouskool Boland huisves, terwyl Hoër Jongenskool besoek gaan aflê in Stellenbosch, teen die span van Paul Roos Gimnasium.
More
News
|
