DIE Kankervereniging van Suid-Afrika (CANSA) bied in samewerking met PathCare spesiale tariewe gedurende Junie en Julie vir PSA bloedtoetse om moontlike probleme in die prostaat vroegtydig op te spoor.
Hierdie toetse word teen R70 kontant aangebied tot einde Julie. Mans ouer as 50 jaar word aangemoedig om jaarliks hierdie siftingstoets vir prostaatkanker te ondergaan.
Hoe vroeër prostaatkanker opgespoor word, hoe beter die kanse op doeltreffende behandeling. Die Prostaat Spesifieke Antigeen (PSA) toets is ’n bloedtoets wat die teenwoordigheid van ’n sekere proteïen, wat in die prostaatklier gevorm word en ’n aanduiding van kanker kan wees, identifiseer.
Vroeë waarskuwingstekens van prostaatkanker sluit in probleme om te urineer, herhaalde behoefte om te urineer, veral snags, en probleme om die urinestroom te begin en te stop.
Latere gevaartekens van prostaatkanker sluit in bloed in die urine, ’n pynvolle of brandende sensasie tydens urinering en pyn in die lae rug, bobene of bekken.
Mans kan tot 31 Julie bloed laat trek (sonder afspraak) by Paarl PathCare Lab (021-872-5158), in Wellington by drs Portwig en Pienaar (021-873-1057) of in Franschhoek by drs Van der Merwe en Heywood (021-876-2304).
Uitslae sal via CANSA aan alle kliënte terugbesorg word.
Skakel Barbara Williams van CANSA by 021-873-6358.
