Liga-wedloop steeds wawyd oop
2010-07-01
Jaco van Wyk
DIE wedloop tot liga-glorie is weer wawyd oop nadat twee van die streek se grootste kanonne, Vineyards en Riverstones, die afgelope naweek hard aarde toe gebring is met skoknederlae. Vineyards se eenpunt-nederlaag (33-34) teen die onvoorspelbare Windmeul United, op laasgenoemde se tuisveld in Agter-Paarl, was sweerlik die grootste opskudding van die naweek. Volgens WP Klubrugby se webtuiste (www.wpclubrugby.co.za) is Vineyards steeds die liga-voorlopers (49 punte na 13 wedstryde, 9 seges, 2 nederlae en 2 gelykop), terwyl Windmeul agtste op die punteleer lê (18 punte na 8 wedstryde, 3 seges en 5 nederlae). Vineyards se tweede en derde spanne het egter soet by die suur gevoeg met seges van 24-10 en 20-3 oor hul eweknieë van Windmeul.
* Die span wat tans in Vineyards se nek blaas, Riverstones, se 11-19 nederlaag teen die sesde gekeurde Albions was net so ’n groot skok. Ná tien wedstryde (32 punte, 6 gewen, 2 verloor en 2 gelykop) was Riverstones besig om stilletjies die nommer-een posisie te bekruip, voor Albions (8 wedstryde, 26 punte, 6 gewen en 2 verloor) die naweek hul planne ietwat bederf het. Riverstones se tweede span het 19-12 gewen teen Albions II en Albions se derde span het vir Riverstones III 20-15 geklop.
* Intussen het Young Standards (derde op die punteleer met 32 punte ná 10 wedstryde, 6 seges en 4 nederlae) hul goeie peil van die afgelope paar weke voortgesit, met ’n 38-8 oorwinning oor Pêrel United (11de op die punteleer). Standards se tweede span het met 26-17 ook die pyp gerook, terwyl Standards se derde span 7-12 vasgeval het teen Pêrel United III.
* Die vierde geplaaste Young Gardens het vir Allandale (10de) met 20-0 geklop, terwyl Gardens II en III onderskeidelik met 37-0 en 8-7 gewen het. Allandale hou op 10 Julie ’n dans te Drakenstein gevangenis. Whani van Stofpad sal die musiek verskaf (kontak 021-864-8195).
* Violets het Saterdag met Langa afgereken (12-7) in ’n voorwedstryd vir die Paarl Streekspan op die Daljosafat-stadion. Violets se voorspelers het stewig vertoon, met die slotte Mokkie en Eduardo de Jager aan die voorpunt. Die agterlyn het sodoende goeie besit gekry, met Bunce Swarts (losskakel, 1 drie en een doelskop) wat die bal goed kon wegstuur. Violets se ander driedrukker was Jeremy Klaasen.
WEDSTRYDBEPALINGS (03 Julie): Albions vs Pêrel United (Dal B); Riverstones vs Simondium (Dal A); Standards vs Vineyards (Dal C); Laer Paarl vs Allandale (Drakenstein); Windmeul vs Violets (Windmeul). Gardens het ’n loslootjie.
More
News
|
