Streekspanne keil mekaar deeglik op
2010-07-29
DIE eerste rugbyspan van Vineyards het Saterdag wéér ’n weghol-oorwinning behaal in die Paarl Streekliga, terwyl Riverstones, Young Gardens en Albions ook goeie seges aangeteken het.
VINEYARDS VERMORSEL PÊREL UNITED
Die liga-leiers, Vineyards, het ’n allemintige 12 drieë behaal om die manne van Pêrel United met 82-0 stert tussen die bene huis toe te stuur. Vineyards II het 33-0 geseëvier en Vineyards III het 12-12 gelykop gespeel met Vineyards III.
ALBIONS HOU KANSE LEWENDIG
Albions Rugbyklub het hul kanse om die halfeindronde van die streekliga te haal lewendig gehou, deur vir Allandale gemaklik met 23-11 te troef. Albions II het 8-3 gewen en Allandale se derde span het 19-0 geseëvier.
RIVERSTONES BEHAAL GOEIE SEGE
Riverstones lyk steeds na een van die gevaarspanne in die streekliga ná sy 24-11 oorwinning oor Violets. Violets II het egter 10-8 gewen en Riverstones III was met 8-0 baas.
GARDENS TROEF STANDARDS MET GEMAK
Young Gardens het Saterdag verspotmaklik afgereken met Young Standards (39-5). Gardens se tweede- en derde spanne was elk ook aan die wenkant met 20-0 en 15-0 seges.
WEDSTRYDBEPALINGS: (31 Julie) Albions vs Violets (Daljosafat-stadion); Gardens vs Riverstones (Gardens Park); Windmeul vs Standards (Dal A); Allandale vs Pêrel United (Drakenstein).
More
News
|
