DIE Kankervereniging van Suid-Afrika (KANSA) stel sy omvattende versorging- en ondersteuningsprogram ten toon, as deel van Kankerweek.
“Die woorde “jy het kanker” laat mense gewoonlik geskok, buite beheer en hopeloos voel. Kansa ondersteun hulle en hulle geliefdes deur na hulle behoeftes om te sien wanneer hulle dit die nodigste het,” sê Sue Janse van Rensburg, Kansa se HUB en langtermyn kankeroorwinnaar.
Sy voeg by, “Meer as 100 000 Suid-Afrikaners word jaarliks deur kanker geraak. Kansa, wat een van die voorste kankerbeheerorganisasies in Suidelike Afrika is, befonds kankernavorsing, maak voorspraak vir beter kankerbeheermaatreëls en lig die publiek in omtrent die belangrikheid van voorkoming en opsporing om die impak daarvan op gemeenskappe te verminder.”
Kansa verleen al bykans 80 jaar ondersteuning aan diegene wat deur kanker geraak is. Hulle omgee- en ondersteuningsprogram sluit aktiewe ondersteuningsgroepe in wat pasiënte, langtermyn oorwinnaars en geliefdes in aanraking bring met ander oorwinnaars en versorgers vir insig, morele begrip en ondersteuning, hoop en inspirasie.
Kansa se dubbele ‘Neem Beheer’ oudio CD wat in Afrikaans, Engels, Sotho en Zoeloe beskikbaar is, help diegene wat met kanker gediagnoseer word, asook hulle geliefdes, om die situasie beter te hanteer deur inligting en praktiese wenke te verskaf om fisiese, emosionele en geestelike welsyn te bevorder, voor en tydens behandeling.
Verder voorsien Kansa stomaterapieklinieke waar voor- en ná-operatiewe berading, intra-operatiewe versorging, opleiding in hanteringsvaardighede aan pasiënte en hul gesinne, wondversorging en inkontinensie-advies deel vorm van hierdie diens. Pasiënte kan ’n volledige reeks stoma (en verwante) produkte teen baie lae koste by verskeie Kansa-kantore aankoop.
Plattelandse pasiënte wat kankerbehandeling ontvang by onkologie-eenhede in Tygerberg en Groote Schuur Hospitaal kan gehuisves word by Kansa se twee Tussentuistes, Eikenhof en Tygerberg vir gemiddeld ses weke op ’n slag.
Vir meer inligting kontak vir Barbara Williams by 021-873-6358.
