Rugby-flitse
2010-08-19
BOLAND HOËRSKOLE FINAAL
Boland Hoërskole se bekerfinale vind Woensdag 25 Augustus plaas op die Boland-stadion. In die Superliga Wynland-afdeling pak Bergrivier Sekondêr vir Groendal om 14:00. In die Superliga Overberg-afdeling pak Hawston vir Bredasdorp om 15:30. In die Premierliga-afdeling pak HTS Drostdy vir Schoonspruit om 17:00. Hekgeld is R10 vir volwassenes. Leerders met skooldrag kry gratis toegang.
PAARL VAL VAS
Paarl Rugbyklub het Saterdag 17-24 vasgeval teen Brackenfell Rugbyklub, op laasgenoemde se tuisveld. Paarl was deurgaans aan stuur van sake en het in ’n stadium gerieflik voorgeloop. ’n Rooikaart aan Clive Samuel (ná twee geelkaarte), het Paarl se ritme egter versteur, wat uiteindelik tot ’n nederlaag gelei het. Paarl se puntemakers was Shaun Taylor (1 drie), Gavin Williams (1 drie) en Darryl Heyns (2 doelskoppe en ’n strafdoel). Eerskomende naweek speel Paarl teen Scottsdene.
NEWTON AAN WENKANT
Ná drie agtereenvolgende nederlae, het Newtons Rugbyklub uiteindelik hul staal getoon deur die afgelope naweek vir Young Hearts van Pella met 31-23 te klop. Newton het uiteindelik 5 drieë ingeryg om sy teenstander behoorlik af te stof. Hearts se losskakel het met sy goeie skopwerk sy span egter deurgaans in die wedstryd gehou. Newtons se uitblinkers was Randal April (senter), Lluwellyn Davids (senter - 2 drieë), Devon van Wyk (vleuel - 2 drieë), Conroy Barron (stut) en Roderick Loverlott (1 drie). Jacquin Ruthford het drie drieë verdoel. Newtons speel Saterdag tuis teen Velddrif Rugbyklub op die Boy Louw-velde.
VILLAGERS LOOP VOOR
Villagers van Newton het Saterdag op die Boy Louw-velde gewys waarom hulle die liga-voorlopers is, deur vir Adelaars met 12-11 te wen. Adelaars het eerste gaan druk, maar Villagers het teruggeveg, met Ricardo Fortuin wat al sy span se punte behaal het deur strafskoppe. Buiten Fortuin, wat ook uitstekend verdedig het, was die ander uitblinkers Anthony Juries, Alfredo Japhta en Mario Cleaves. Villagers speel Saterdag weg teen Young Eagles van Dassenberg. Die bus vertrek 12:30.
More
News
|
